នគរបាលព្រហ្មទណ្ឌកម្រិតធ្ងន់ សហការជាមួយ នគរបាលស្រុកមុខកំពូល ចុះពិនិត្យសាកសពបុរសម្នាក់ ក្នុងករណីឃាតកម្ម
13-March-2019 | ដោយ ពលមនសិការ
កណ្ដាល៖ នគរបាលការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្ដកណ្ដាល សហការជាមួយនគរបាលស្រុកមុខកំពូល ចុះទៅដល់កន្លែងកើតហេតុធ្វើការពិនិត្យសាកសពបុរសម្នាក់ស្លាប់ដោយអំពើឃាតកម្ម នៅវេលាម៉ោង១៥និង៣០នាទី ថ្ងៃទី១២ ខែមីនា ឆ្នាំ២០១៩ ស្ថិតក្នុងភូមិស្វាយជ្រុំ ឃុំព្រែកដំបង ស្រុកមុខកំពូល ខេត្តកណ្តាល ។
មន្ដ្រីនគរបាលការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្ដកណ្ដាល បានឲ្យដឹងថា ជនរងគ្រោះឈ្មោះ ក្រង ចំរើន ភេទប្រុស អាយុ៣៨ឆ្នាំ មុខរបរ លក់ដូរ មានទីលំនៅភូមិស្វាយជ្រុំ ឃុំព្រែកដំបង ស្រុកមុខកំពូលខេត្តកណ្ដាល ។ ចំណែកជនសង្ស័យមានគ្នា២នាក់ រួមទាំងបក្ខពួកពុំទាន់ស្គាល់អត្ដសញ្ញាណ រត់គេចខ្លួនបាត់ស្រមោល ។
ប្រភពដដែលបន្ដថា កន្លងមក បុរសជនរងគ្រោះគឺមនុស្សប្រើប្រាស់គ្រឿងញៀន និងតែងប្រើអំពើហិង្សាក្នុងគ្រួសារជាញឹកញាប់ មិនត្រឹមតែប៉ុណ្ណោះក៏បានដើរបង្កររករឿងប្រជាពលរដ្ឋជិតខាងជាអ្នកលក់ដូរដូចគ្នាផងដែរ។ លុះមកដល់ថ្ងៃកើតហេតុ យុវជនសង្ស័យ២នាក់ បាននាំគ្នាចូលបរិភោគមីហិរដែលមានទីតាំងនៅជិតផ្ទះជនរងគ្រោះ ខណៈដែលកំពុងបរិភោគក៏ស្រាប់តែជនរងគ្រោះពុំដឹងជាមកពីណាទេ ដោយមានសភាពស្រវឹងស្រា បានដើរសំដៅមករកជនសង្ស័យទាំង២នាក់ ខណៈកំពុងបរិភោគមីហិរ រួចក៏រករឿង និងវាយទៅលើយុវជនសង្ស័យ ជាហេតុធ្វើឲ្យយុវជនសង្ស័យទាំង២នាក់ខឹង ក៏ជិះម៉ូតូចេញទៅក្រៅបាត់ទៅ លុះរយះពេលប្រហែល១៥នាទីក្រោយមក ក៏ស្រាប់តែជនសង្ស័យ២នាក់បានត្រឡប់មកវិញ ដោយមានបក្ខពួក៥នាក់ ជិះម៉ូតូ៣គ្រឿងប្រដាប់ដោយដាវ ដំបង និងដែកបំពង់ទីប មកព្រួតវាយជនរងគ្រោះ បណ្ដាលឲ្យរងរបួសជាទម្ងន់ រហូតស្លាប់បាត់បង់ជីវិតនៅនឹងកន្លែង ។ ក្រោយពីធ្វើសកម្មភាពរួច ក្រុមជនសង្ស័យបានជិះម៉ូតូរត់គេចខ្លួនបាត់ស្រមោល ។
បន្ទាប់ពីនគរបាលស្រុកទទួលបានព័ត៌មានខាងលើ ភ្លាមនោះក៏រាយការណ៍បន្ដទៅនគរបាលការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្ដកណ្ដាល ធ្វើការពិនិត្យសាកសព និងកសាងសំណុំរឿង ស្រាវជ្រាវ ដើម្បីរកជនសង្ស័យចាត់ការតាមនីតិវិធីច្បាប់ ៕
ចំនួនអ្នកទស្សនា
- ថ្ងៃនេះ131
- ម្សិលមិញ11441
- សប្តាហ៍នេះ29961
- ខែនេះ145111
- ឆ្នាំនេះ145111
- សរុប20587567